Jadı́zı̨́ në́n ts’ı̨ dëne yatı xa yatı néth theɂą, that’ı́n yatı tá Offıcıal Languages Act húlye ɂeyı beghár ɂı̨łághádhel ɂełk’éch’a yatı yatı néth xa hultágh ɂat’e, ɂeyı ts’ı̨ łǫ́tą ɂełk’éch’a dëne dédlı́n yatı dólı̨ sı́ ɂeyı tth’ı yatı néth xa hultágh ɂat’e. Ɂedërı yatı néth theɂą sı́, ɂeyı bet’á t’ąlázı́ t’a yatı néth xa húltágh sı́ t’á bets’édı xa rekér xadúwı́le, beba ɂełı́géth dën déłtth’ı kų́e ts’ı̨-u, dëneghą nátı kų́é yı́s-u, tth’ı jadı́zı̨́ në́n ts’ı̨ nı́é ts’ë́n k’aldhër bets’ı̨ offıce dólı̨ ɂeyër chu dëne ts’énı dé ɂeyı tth’ı kú.
Jadı́zı̨́ në́n ts’ı̨ dëne yatı xa yatı néth theɂą ɂeyı bets’ı̨ɂë́n jadı́zı̨́ në́n ts’ı̨ dëne yatı xa t’atthe theda núút’ągh ɂat’e, that’ı́n yatı t’á Offıcıal Languages Commıssıoner húlye ɂat’e. T’a yatı yatı néth xa hultágh t’á dëne ts’édı xa rets’ekér-u, hájáı́le dé, jadı́zı̨́ në́n ts’ı̨ dëne yatı xa t’atthe theda háts’edı dé, yek’áúnetagh xadúwı́le. Yek’áúnétągh nát’e dłą́gh dé, jadı́zı̨́ në́n ts’ı̨ dëne yatı xa t’atthe theda sı́ t’a húłɂą sı́ ghár jadı́zı̨́ në́n ts’ı̨ nı́é ts’ë́ k’aldhër chu beba ɂelı́ghı́th dëné yatı gháɂa xadúwı́lé, t’at’u nezų́ beghálada dé súghá yıdhën sı́, ɂeyı ghą.
Neyatı besets’údı́le yıdhën dé, ją ts’ë́n nuwets’ë́n yanełtı 1-800-661-0889
